STUDIO8 er ljósmyndastúdíó í Reykjavík með stórt hjarta. Við leggjum metnað okkar í að skapa frumlegar ljósmyndir og veita persónulega þjónustu fyrir einstaklinga, vinnustaði og fjölskyldur. Við tökum vel á móti þér!
ASTA KRISTJÁNSDÓTTIR Ljósmyndari & stofnandi
Að taka myndir af fólki hefur verið ástríða Ástu síðan hún fékk sína fyrstu myndavél, aðeins 14 ára gömul. Síðan þá hefur hún myndað þúsundir einstaklinga og byggt upp feril sem spannar tísku og auglýsingar.
Ferill hennar hófst sem fyrirsæta í Japan og leiddi hana síðar á alþjóðlegan vettvang. Nokkrum árum síðar stofnaði hún og byggði upp Eskimo Models með starfsemi í Reykjavík, Mumbai og Tomsk í Síberíu. Reynslan beggja vegna myndavélarinnar hefur gefið henni einstaka innsýn í hvernig skapa má traust, öryggi og sjálfstraust fyrir framan myndavélina og fanga sterkar myndir.
Ásta stundaði ljósmyndanám við Parsons School of Design í New York, þar sem hún þróaði sinn persónulega stíl sem ljósmyndari og lauk síðar ljósmyndanámi hjá Nick Knight í London. Myndir hennar einkennast af hreinum stíl og því að draga fram persónuleika og sögu hvers einstaklings.
Árið 2013 stofnaði Ásta STUDIO8 í Reykjavík. Síðan þá hefur hún unnið með fjölbreyttum hópi viðskiptavina, allt frá alþjóðlegum vörumerkjum og fjölmiðlum til frumkvöðla, listafólks og fyrirtækja. Myndir eftir Ástu hafa m.a birst í Vogue Italia, Vogue India og Surface Magazine.
BIRTA STEFÁNSDÓTTIR Aðstoðarljósmyndari
Birta lauk BA enskunámi með fjölmiðlafræði sem aukagrein hjá HÍ árið 2019. Hún hefur starfað hjá Hildi Hafstein skartgripahönnuði frá árinu 2020 og gegnir þar hlutverki verslunarstjóra en sér einnig um að taka ljósmyndir og búa til efni fyrir samfélagsmiðla. Birta hefur alltaf haft brennandi áhuga á tísku, ljósmyndun og stíliseringu.
Frá árinu 2022 hefur Birta verið í læri hjá Ástu og fengið að spreyta sig undir hennar leiðsögn.
MARGRÉT R. JÓNASAR Förðunarfræðingur
Margrét er einn virtasti förðunarmeistari Íslands og hefur starfað við fagið í áratugi. Á ferli sínum hefur hún unnið fyrir alþjóðleg snyrtivörumerki á borð við Chanel, Dior og MAC. Hún var hluti af MAC Pro Team og kom að stórum viðburðum, meðal annars Fashion Week, auk þess sem hún starfaði sem förðunarstjóri hjá Ríkisútvarpinu og Stöð 2. Hún hefur séð um förðun fyrir auglýsingaherferðir, sjónvarpsþætti, tískusýningar og tímarit.
Margrét hefur einnig lagt sitt af mörkum til kennslu í faginu. Hún kenndi við EMM Förðunarskólann og síðar við Elite Make Up Academy, auk þess að halda fjölda námskeiða fyrir einstaklinga og fyrirtæki. Árið 2006 stofnaði hún Make Up Store á Íslandi. Verslunin var sú fyrsta sinnar tegundar hér á landi sem bauð upp á bæði persónulega förðunartíma og hópnámskeið.
Sérgrein Margrétar er að finna það sem hentar hverri konu best. Með áralangri reynslu, næmu auga fyrir smáatriðum og fjölbreyttri tækni leggur hún áherslu á að draga fram náttúrulega fegurð og styrkleika hverrar konu, frekar en að fela þá.
